यी हुन् दशौँ हजार मतदाताबीच प्रतिस्पर्धा, दुई–चार मतमा जित–हार हुनेहरु

काठमाडौं, १ पुस   ।

प्रदीप पौडेल पाँच मतले पराजित
तनहुँ २ प्रदेश सभा (क) मा कांग्रेसका प्रदीप पौडेल माओवादी केन्द्रकी आशा कोइरालासँग जम्मा पाँच मतले पराजित हुन पुगे । कोइरालाले १६ हजार ६४६ मत ल्याउँदा पौडेलले १६ हजार ६४१ मत पाएका छन् । यसपालिको निर्वाचनमा सबैभन्दा कम मतले पराजित हुने उम्मेदवार उनी नै हुन् ।

काठमाडौंमा १९ मतको हारजित
काठमाडौं १ प्रदेश सभा (ख) मा कांग्रेसका सुरजचन्द्र लामिछाने १९ मतले पराजित हुन पुगे । वाम गठबन्धनका एमाले उम्मेदवार गणेशप्रसाद दुलालले ४२ सय ४२ र लामिछानेले ४२ सय २३ मत पाए।

हुम्लामा कांग्रेस उम्मेदवार शाहीले ४७ भोटले हारे 
हुम्लामा स्वतन्त्र सांसद छक्कबहादुर लामाले कांग्रेस उम्मेदवार मंगलबहादुर शाहीलाई ४७ मतान्तरले पराजित गरे । लामाले आठ हजार ४९१ र शाहीले आठ हजार ४४४ मत ल्याए । माओवादी नेता लामाले टिकट नपाएपछि विद्रोही उम्मेदवारी दिएका थिए ।

फोरम उम्मेदवारले दुई सयभन्दा कम मतले हारे 
पर्सा २ प्रदेश सभा (क) मा दुई सयभन्दा कम अन्तरको हारजित भयो । कांग्रेसका राजेश्वरप्रसाद साहले संघीय समाजवादी फोरमका रामनरेशप्रसाद यादवलाई १८० मतले पराजित गरे । साहले १० हजार २५९ मत ल्याउँदा पराजित भएका यादवले १० हजार ७९ मत प्राप्त गरे ।

कम मतदाता भएको मनाङमा २७९ मतान्तर
कुल मतदाता पाँच हजार आठ सय ८१ भएको मनाङमा एमालेका पाल्देन छोपाङ गुरुङले कांग्रेसका टेकबहादुर गुरुङलाई २७९ मतले पराजित गरे । पाल्देनले दुई हजार तीन सय मत ल्याउँदा कांग्रेसका गुरुङले २०२१ मत मात्र पाए ।

मुस्ताङमा पनि ३६३ को हारजित
नौ हजार ४२७ मतदाता रहेको मुस्ताङमा एमाले उम्मेदवार प्रेमप्रसाद तुलाचनले कांग्रेसका रोमी गौचन थकालीलाई तीन सय ६३ मतले पराजित गरे । तुलाचनले ३५४४ र गौचनले ३१८१ मत ल्याए।

रौतहटमा १२५ मतको हारजित
रौतहट ४ प्रदेश सभा (ख) मा स्वतन्त्र सांसद शेख अबुल कलामले कांग्रेसका रामाज्ञ रायलाई १२५ मतअन्तरले पराजित गरे । कलामले ७३ सय ९३ तथा रायले ७२ सय ६८ मत प्राप्त गरे ।

पर्सामा १५९ मतले चन्द्रकिशोर पराजित
पर्सा ३ प्रदेश सभा (क) मा संघीय समाजवादी फोरमका अब्दुल रहिम अन्सारीले कांग्रेसका चन्दकिशोर प्रसादलाई १५९ मतले पराजित गरे । अन्सारीले सात हजार चार र चन्द्रकिशोरले ६ हजार ८४५ मत ल्याए ।

पर्सा ४ (क) मा ४४८ को अन्तर
पर्सा ४ प्रदेश सभा (क) कांग्रेसका शंकरप्रसाद चौधरी ४४८ मतअन्तरले विजयी भए । उनले सात हजार ४८८ र एमाले उम्मेदवार जयप्रकाश थारूले सात हजार ४० मत ल्याए ।

सर्लाहीमा ५७१ मतान्तर
सर्लाही १ मा राजपाका प्रमोद साहले एमालेका ध्रुव गौतमलाई ५७१ मतले हराए । साहले २२ हजार ३६ र गौतमले २१ हजार ४६५ मत प्राप्त गरे ।

धादिङमा ६४० ले कांग्रेस उम्मेदवार पराजित 
धादिङ २ मा कांग्रेसका दिलमान पाख्रिन एमालेका खेम लोहनीसँग ६४० मतले पराजित भए । लोहनीले ३६ हजार ६५६ र पाख्रिनले ३५ हजार ६१६ मत ल्याए ।

राजदूत त्यागेका उपाध्याय ९४६ मतले पराजित
भारतका लागि नेपाली राजदूत रहेका दीपकुमार उपाध्याय राजीनामा गरेर चुनाव लड्न आएका थिए । उनी गृहजिल्ला कपिलवस्तुको १ नम्बर क्षेत्रबाट प्रतिनिधिसभामा उम्मेदवार बनेका थिए । अघिल्लोपटक पनि सोही क्षेत्रबाट पराजित उपाध्याय यसपालि माओवादी केन्द्रका चक्रपाणि खनालसँग ९४९ मतले पराजित भए । खनालले २९ हजार ७९९ र उपाध्यायले २८ हजार ८५३ मत ल्याए ।

चर्चित नेता जसले एक हजार कम अन्तरले हारे

वामदेव ७५३ मतले पराजित
एमाले उपाध्यक्ष वामदेव गौतम बर्दिया १ मा कांग्रेसका सञ्जय गौतमसँग ७५३ मतले पराजित भए । कांग्रेस बर्दिया जिल्ला सभापति रहेका सञ्जयले वाम गठबन्धन बनाउन भूमिका खेल्ने वामदेवलाई पराजित गरेका हुन् । सञ्जयले ४४ हजार ८२९ र वामदेवले ४४ हजार ७६ मत ल्याए ।

शेखर ६७५ मतले पराजित
मोरङ ६ मा कांग्रेस नेता शेखर कोइराला एमाले नेता लालबाबु पण्डितसँग ६७५ मतले पराजित भए । मोरङमा शेखरले ३३ हजार २६६ र पण्डितले ३३ हजार ९४१ मत ल्याए ।

जोशी ४४४ मतले पराजित
काठमाडौं ८ मा कांग्रेस नेता नवीन्द्रराज जोशी ४४४ मतले एमालेका जीवनराम श्रेष्ठसँग पराजित भए । ०७० मा यही क्षेत्रबाट जितेका जोशीले १२ हजार ९५३ मत ल्याउँदा श्रेष्ठले १३ हजार ३९७ मत प्राप्त गर्दै जित दर्ता गरे ।

गच्छदारसँग भगवती चौधरी ३२१ मतले पराजित
निर्वाचनको मुखैमा कांग्रेस फर्किएका विजयकुमार गच्छदारले रोचक जित हात पारे । सुनसरी ३ मा गच्छदारले एमाले उम्मेदवार भगवती चौधरीविरुद्ध ३२१ मतको रोचक जित हात पारेका हुन् । गच्छदारले ३८ हजार ९७२ र चौधरीले ३८ हजार ६५१ मत प्राप्त गरिन् ।

२५८ मतले लेखक पराजित 
कञ्चनपुर ४ बाट कांग्रेस उम्मेदवार रमेश लेखक २५८ मतले पराजित हुन पुगे । मतगणना अवधिभर नै एमालेका दीपकप्रकाश भट्टसँग थोरै मतको घटबड भइरहँदा अन्ततः लेखक २५८ मतले पछि परेका हुन् । भट्ट २६ हजार तीन सय ६४ मत ल्याएर विजयी हुँदा लेखकले २६ हजार एक सय ६ मत मात्र प्राप्त गरे ।

मञ्जुविरुद्ध खड्काको ५४८ मतको जित
उदयपुर १ को प्रतिनिधिसभामा कांग्रेस नेता डा. नारायण खड्का ५४८ मतले विजयी बने । उनले ३३ हजार १४२ मत र एमालेकी मञ्जुकुमारी चौधरीले ३२ हजार ५९४ मत ल्याइन् । चौधरीले ०७० को संविधानसभा निर्वाचनमा २३ मतले पराजय बेहोरेकी थिइन् । आजको नयाँपत्रिका दैनिकमा खबर छ।

Single News Button

Nepali Calendar