नदी तर्न तुइनकै भर, राजनीतिक पहुँच नहुँदा बनेन पुल

 

जाजरकोट,बैशाख २ । नलगाड नगरपालिका–१ ठुलाबगरकी ४१ वर्षीया हस्तकला घर्ती घरबाट दैनिक तरकारी बिक्री गर्न रिम्ना बजार जान्छिन्। तुइनमा झुण्डिएर जाँदा बाँचेर फर्किइन्छ कि फर्किइँदैन भन्ने चिन्ताले सताउने उनी सुनाउँछिन्।

सोही ठाउँकी गोलाबी पुन, पठवीर पुन, टबबहादुर घर्ती र अमर पुनलगायत स्थानीय तुइनको भरमा नदी वारपार गरी बजार आउजाउ गर्न बाध्य छन्। ठूलाबगरका स्थानीयका लागि सदरमुकाम खलङ्गा तथा स्थानीय बजार पुग्न जोखिमपूर्ण तुइन चढ्नै पर्ने बाध्यता छ।  उनीहरू मात्र होइन, यहाँका बासिन्दाले वर्षौँदेखि तुइनबाटै जोखिम मोलेर भेरी नदी वारपार गर्दै आएका छन्।

‘ठूलाबगर, खर्चा, दम्सीला, भित्रखोला, ओडारा, पालीलगायत गाउँका १०० घरपरिवार स्थानीय प्रविधिबाट निर्मित तुइनकै भर वारपार गर्न बाध्य छन्’, आठवीसकोट नगरपालिका–१४ का सिर्जना आधारभूत विद्यालयका शिक्षक ज्ञानबहादुर घर्तीले भने।

त्यस्तै पश्मिरुकुमको पिपलचौर, छोटेतरा, छेपारे, चाख्लेमेलालगायत ठाउँका बासिन्दा पनि उक्त तुइनको सहयोगले भेरी नदी वारपार गर्दै आएका छन्। स्थानीय प्रविधिबाट काठले बनेको ढुङ्ग्रोमा बसी फलामको डोरीमा झुण्डिएर १०० मिटर चौडा भेरी नदी वारपार गर्ने गरेको स्थानीयको भनाइ छ। तुइन तरेरै जिन्दगी बित्ने चिन्ताले सताउने गरेको स्थानीयवासी बताउँछन्। पुल बनाइदिन विभिन्न निकायसँग आग्रह गर्दा पनि कसैले नसुनेको स्थानीयको गुनासो छ।

पुल भएको स्थानसम्म पुग्न डेढ घण्टा समय लाग्छ। त्यो पनि जोखिमपूर्ण भिरको बाटो छ। उक्त अप्ठेरो बाटोबाट लडेर कतिको ज्यानसमेत गइसकेको छ।

भेरी नदीमा पुल बनाई दिन विभिन्न निकायमा पटक पटक आग्रह गरे पनि  पहुँच नहुँदा सम्बन्धित निकायको ध्यान नपुगेको ठूलाबगरवासीको गुनासो छ। यता नलगाड नगरपालिकाको दुई स्थानमा तुइन सञ्चालनमा रहेको नगरप्रमुख टेकबहादुर रावलले बताए।

वडा नं‍. १ को ठूलाबगर र वडा नं. ८ मैदे मालुवातरामा तुइन सञ्चालनमा छन्। पुल बनाउन नगरको बजेटले नभ्याPsfn] सङ्घीय सरकारसँग माग गरे पनि अहिलेसम्म कुनै सुनुवाइ नभएको नगरपालिकाले जनाएको छ।