रवि सहित तीनै जनालाई अदालत पुर्याइयो (हेर्नुस् भिडियो)

चितवन । पत्रकार शालिकराम पुडासैनीको आत्महत्या प्रकरणमा प्रहरीले पक्राउ गरेको तीनै जनालाई चितवन जिल्ला अदालतमा उपस्थित गराइएको छ ।

प्रहरीले अनुसन्धानका लागि म्याद थप गर्न अदालतमा हाजिर गराएको हो । उता चर्चित सञ्चारकर्मी रवि लामिछानेका कानुन व्यवसायीहरुले भने तारेखमा छोडेर अनुसन्धान गर्नका लागि पहल गरिरहेको बुझिएको छ । लामिछानेको पक्षबाट नेपाल बार एशोसिएसनका पूर्व महासचिव सुनील कुमार पोखरेलको नेतृत्वमा कानुन व्यववसायीहरुले म्याद थपबारे बहस गरिरहेका छन् ।
हिजो साँझ पक्राउ परेर चितवन ल्याइएका तीनै जना आरोपितहरुलाई आज मध्यान्न १२ बजे सरकारी वकिलको कार्यालयमा उपस्थित गराएर अदालत लगिएको हो । रविका समर्थकहरुले जिल्ला प्रहरी कार्यालय चितवनदेखि चितवन जिल्ला अदालतसम्म करिब पाँच सय मिटरको क्षेत्रमा रविको रिहाईको माग गर्दै नाराबाजी गरेका छन् ।
प्रहरीले रवि लामिछानेसहित तीनै जनालाई जिल्ला प्रहरी कार्यालय चितवनको पछाडिपट्टी रहेको प्रहरी नायब उपरीक्षकको क्वाटरबाट निकालेर पछाडिको बाटोबाट नै अदालतमा उपस्थित गराएको छ । रवि लामिछानेको रिहाईको माग गर्दै भरतपुरको चौबिसकोठीमा पूर्वपश्चिम राजमार्ग अवरुद्ध गराउन खोज्ने रविका पाँच जना समर्थकलाई प्रहरीले नियन्त्रणमा लिएको छ । अहिले चितवनको अवस्था सामान्य रहेको जिल्ला प्रहरी कार्यालय चितवनका प्रमुख प्रहरी उपरीक्षक दानबहादुर मल्लले बताउनुभयो ।