बर्दिया : दसैँ बिदामा पर्यटकको आगमन बढेपछि बर्दिया राष्ट्रिय निकुञ्ज आसपासका पर्यटन व्यवसायीलाई भ्याइनभ्याइ भएको छ । पर्यटकको चहलपहल बढेसँगै ठाकुरद्वाराका साना–ठूला होटल भरिभराउ भएका छन् भने निकुञ्जमा जिप सफारी गर्ने पर्यटकको संख्या पनि बढेको छ ।

बर्दिया राष्ट्रिय निकुञ्जका अनुसार कात्तिक १ देखि ६ गतेसम्म २ हजार १ सय ३७ जनाले निकुञ्जको अवलोकन गरेका छन् । तीमध्ये १ हजार ५ सय ८२ पुरुष र ८ सय ५५ महिला रहेको विवरणमा उल्लेख छ । यद्यपि, निकुञ्जले उपलब्ध गराएको पुरुष र महिला पर्यटकको संख्याको योग कुल संख्यासँग मेल खाँदैन ।

उक्त अवधिमा २ सय ७४ विदेशी पर्यटकले निकुञ्जको अवलोकन गरेका छन् । तीमध्ये १ सय ३९ पुरुष र १ सय ३५ महिला छन् । त्यसैगरी, सार्क राष्ट्रबाट ५० पुरुष र २६ महिलासहित ७६ पर्यटक आएको निकुञ्जकी निमित्त सूचना अधिकारी तथा सहायक संरक्षण अधिकृत मञ्जु पौडेलले बताइन् ।

गत असोजमा भने १ हजार ७० आन्तरिक पर्यटकले निकुञ्जको भ्रमण गरेका थिए । सोही अवधिमा सार्क राष्ट्रबाट २ सय ४८ र अन्य विदेशी मुलुकबाट ५ सय ५५ पर्यटक आएको पौडेलले जानकारी दिइन् ।

दसैँमा पर्यटकको आगमन बढेपछि पर्यटन व्यवसायी उत्साहित भएका छन् । ठाकुरद्वाराका होटलमा पर्यटकको चाप बढेको छ भने जिप सफारीका लागि अग्रिम बुकिङसमेत हुन थालेको छ । पर्यटकको संख्या बढेसँगै कतिपयले जिप सफारीका लागि गाडी नपाउँदा निकुञ्ज अवलोकन गर्न नपाएको गुनासो गरेका छन् ।

पोखराबाट बर्दिया राष्ट्रिय निकुञ्ज घुम्न आएका अनिल न्यौपानेले जिप सफारी गर्न नपाउँदा निकुञ्जको अवलोकन गर्न नपाएको बताए । पर्यटन व्यवसायी रामजी थापाका अनुसार पर्यटकले अग्रिम बुकिङ गरेकाले जिप सफारीमा चाप बढेको छ । निकुञ्ज आसपासमा झन्डै ३० वटा साना–ठूला होटल सञ्चालनमा छन् ।

पर्यटन व्यवसायी कृष्णप्रसाद भट्टराईले यस वर्ष दसैँमा पर्यटकको आगमन बढेकाले तिहारमा पनि पर्यटन गतिविधि थप बढ्ने आशा व्यक्त गरे ।

मुख्यतः पाटे बाघका लागि प्रसिद्ध बर्दिया राष्ट्रिय निकुञ्ज स्वदेशी तथा विदेशी पर्यटकको आकर्षक गन्तव्य हो । निकुञ्जमा १ सय १२ वटा पाटे बाघ रहेको विवरण छ । त्यस्तै, १ सय २० भन्दा बढी हात्ती रहेको अनुमान छ भने ३८ वटा गैँडा रहेका छन् । यहाँ आउने पर्यटकले जिप सफारी तथा पैदल यात्रामार्फत बाघ, गैँडा, हात्तीलगायतका वन्यजन्तुको अवलोकन गर्ने गरेका छन् ।

निकुञ्जबाहेक खाता जैविक मार्गमा पर्ने डल्ला र पत्थरबोझीलगायतका स्थान पनि पर्यटकको रोजाइमा पर्ने गरेका छन् । डल्लामा झन्डै २० वटा होमस्टे सञ्चालनमा छन् । पर्यटकले निकुञ्ज परिसरमा रहेको गोही तथा घडियाल प्रजनन केन्द्र, थारू संग्रहालयलगायतका स्थलको समेत अवलोकन गर्ने गरेका छन् । दृष्टिविहीन गैँडा र समस्याग्रस्त बाघ राखिएका खोरलाई बाहिरबाट हेर्नसमेत पर्यटक पुग्ने गरेका छन् ।

दसैँ बिदामा बढेको पर्यटक आगमनले बर्दियाको पर्यटन व्यवसायमा उत्साह थपेको छ । पर्यटकको चापसँगै होटल, होमस्टे र जिप सफारी व्यवसायमा चहलपहल बढेको छ भने आगामी तिहारमा पनि पर्यटकको आगमन बढ्ने व्यवसायीको अपेक्षा छ ।