लाहोर : च्याम्पियन्स ट्रफी २०२५ को दोस्रो सेमिफाइनल खेल दक्षिण अफ्रिका र न्युजिल्याण्डबिच खेलिएको थियो। यो खेल जितेर न्युजिल्याण्डले फाइनलमा आफ्नो स्थान पक्का गरेको छ। अब फाइनल खेल ९ मार्चमा दुबई अन्तर्राष्ट्रिय रंगशालामा टिम इन्डिया र न्युजिल्याण्डबीच खेलिनेछ।
यसैबिच सेमिफाइनलमा किवी टोलीसँग पराजित भएपछि दक्षिण अफ्रिकाका विस्फोटक ब्याट्सम्यान डेभिड मिलर आईसीसीको एउटा कुराबाट निराश देखिए। मिलरले यसप्रति आफ्नो पीडा व्यक्त गरेका हुन्।
वास्तवमा, समूह एमा न्युजिल्याण्ड र भारतबिचको खेलको नतिजा नआएसम्म सेमिफाइनलमा भारतले कसको सामना गर्ने भन्ने निर्णय हुनसकेको थिएन । त्यसैले समूह बी का दुवै सेमिफाइनलिस्ट दक्षिण अफ्रिका र अस्ट्रेलियाले आफ्नो लिग खेल सकेर दुबई प्रस्थान गरेका थिए।
न्युजिल्याण्डलाई भारतले हराएपछि सेमिफाइनलमा भारतले अस्ट्रेलियाको सामना गर्ने तय भएको थियो । यस्तो अवस्थामा दक्षिण अफ्रिका दुबईबाट पुनः पाकिस्तान फर्कनुपरेको थियो किनभने दोस्रो सेमिफाइनल लाहोरमा हुने तय भएको थियो।
स्पोर्ट्स टकको रिपोर्ट अनुसार, डेभिड मिलरले भने, ‘यो केवल १ र ४० मिनेटको उडान थियो तर हामीले यो गर्नुपर्यो। हामी दिउँसो ४ बजे दुबई पुग्यौँ र भोलिपल्ट बिहान ७:३० बजे फर्कनुपर्यो। यो राम्रो होइन। हामीले आराम गर्न पर्याप्त समय पाएनौँ भन्ने होइन। तर यो अझै पनि ठिक थिएन।’
डेभिड मिलरले न्युजिल्याण्डविरुद्ध अविजित शतक प्रहार गरेपनि दक्षिण अफ्रिकालाई जित दिलाउन सकेनन्। उनले किवी टोली विरुद्ध मात्र ६७ बलमा आफ्नो शतक पूरा गरे। यो च्याम्पियन्स ट्रफीको इतिहासमा कुनै पनि ब्याट्सम्यानले बनाएको सबैभन्दा छिटो शतक थियो। आफ्नो इनिङ्सको क्रममा मिलरले १० चौका र ४ उत्कृष्ट छक्का प्रहार गरे।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
