हङकङ : हङकङका प्रजातन्त्र समर्थक सञ्चार उद्यमी जीमी लाइले सन् २०२२ को ठगी मुद्दामा अपिल जितेका छन्। बिहीबार हङकङको पुनरावेदन अदालतले उनी र सह–अभियुक्तमाथि लगाइएको दोषसिद्धि खारेज गरिदिएको हो।
यसअघि उक्त मुद्दामा लाइलाई झन्डै ६ वर्ष जेल सजाय सुनाइएको थियो। अभियोजन पक्षले उनले आफ्नै निजी परामर्श कम्पनीलाई एप्पल डेलीले भाडामा लिएको कार्यालयमा अवैध रूपमा सञ्चालन गर्न दिएको आरोप लगाएको थियो। यही आरोपका आधारमा उनलाई दोषी ठहर गरिएको थियो।
तर अदालतको पछिल्लो निर्णयपछि ठगीसम्बन्धी सजाय हटे पनि ७८ वर्षीय लाइ तुरुन्त रिहा हुने छैनन्। यस महिनाको सुरुमा उनलाई हङकङको राष्ट्रिय सुरक्षा कानुन अन्तर्गत “विदेशी शक्तिसँग साँठगाँठ” गरेको अभियोगमा २० वर्ष जेल सजाय सुनाइएको थियो, जसका कारण उनी जेलमै रहनेछन्।
लाइ बेलायती नागरिकसमेत हुन् र उनी बेइजिङका कट्टर आलोचक तथा हङकङको प्रजातन्त्र आन्दोलनका प्रमुख व्यक्तित्वमध्ये एक मानिन्छन्। उनलाई सन् २०२० देखि हिरासतमा राखिएको छ।
सन् १९९५ मा उनले स्थापना गरेको एप्पल डेली बेइजिङको आलोचना गर्ने लोकप्रिय ट्याब्लोइड थियो र हङकङको सबैभन्दा ठुलो प्रजातन्त्र समर्थक पत्रिका बनेको थियो। तर लाइ र प्रमुख कर्मचारीहरू पक्राउ परेपछि सन् २०२० मा पत्रिका बन्द गरिएको थियो । उक्त ठगी मुद्दामा लाइसँगै उनको मिडिया कम्पनीका पूर्व कार्यकारी वोंग वाइ–कुङ पनि दोषी ठहर भएका थिए र उनलाई २१ महिनाको जेल सजाय दिइएको थियो।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
