काठमाडौँ : आकर्षक तलबको लोभ देखाएर वैदेशिक रोजगारीका लागि अजरवैजान र फिजी पठाईदिन्छु भन्दै युवाहरूलाई ठगी गर्ने एक व्यक्तिलाई प्रहरीले काठमाडौँबाट नियन्त्रणमा लिएको छ । पक्राउ पर्नेमा मकवानपुरको मनहरी गाउँपालिका वडा नं. २ स्थायी घर भई हाल काठमाडौँको डल्लु बस्ने ३२ वर्षीय शक्ति लामा रहेका छन् ।
काठमाडौँ उपत्यका अपराध अनुसन्धान कार्यालयका अनुसार लामाले ६ जना पीडितहरूबाट कूल २६ लाख ६३ हजार ७१० रुपैयाँ असुलेर लामो समयसम्म सम्पर्कविहीन भएका थिए ।
बेरोजगार युवायुवतीलाई वैदेशिक रोजगारीको झुटा आश्वासन दिई रकम लिएर विदेश नपठाई ठगी गरेको भन्दै पीडितहरूले प्रहरीमा जाहेरी दिएका थिए । सोही जाहेरीका आधारमा खटिएको प्रहरी टोलीले उनलाई बुधबार दिउँसो साढे १२ बजे डल्लुबाट पक्राउ गरेको हो ।
अनुसन्धानका क्रममा लामा यसअघि पनि बैंकिङ कसुर मुद्दामा फरार रहेको खुलेको छ। उनले दाङको इलाका प्रहरी कार्यालय तुलसीपुरमा दर्ता भएको ५ लाख रुपैयाँ बिगो बराबरको बैंकिङ कसुर मुद्दामा समेत प्रहरीलाई छक्याउँदै आएका थिए ।
लामालाई थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको सूचना अधिकारी एवं प्रहरी उपरीक्षक रामेश्वर कार्कीले जानकारी दिए ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
