चितवन : जिल्ला प्रशासन कार्यालय चितवनले बजारमा पाइने सामानहरूमा अनिवार्य रूपमा अधिकतम खुद्रा मूल्य (MRP) र स्पष्ट लेबल राख्न कडा निर्देशन जारी गरेको छ।
सरकारको 'सुधार सम्बन्धी एक सय कार्यसूची' को कार्यान्वयन र आयात नियमन सम्बन्धी कानुनलाई प्रभावकारी बनाउन प्रशासनले यस्तो सूचना जारी गरेको हो। प्रशासनले आयातकर्ता, उद्योगी, विक्रेता र सबै सरोकारवालाहरूलाई निम्न बुँदाहरू पालना गर्न भनेको छ: आयातकर्ताका लागि: विदेशबाट आयात गरिने वस्तुको भन्सार बिन्दुमै अधिकतम खुद्रा मूल्य र आयातकर्ताको विवरण खुल्ने लेबल अनिवार्य लगाउनुपर्ने।
उद्योगी तथा उत्पादकका लागि: उत्पादनकै क्रममा प्याकेजिङमा मूल्य, ब्याच नम्बर, तौल र म्याद सकिने मिति स्पष्ट देखिने गरी लेबल राख्नुपर्ने। विक्रेता (थोक तथा खुद्रा) का लागि: स्पष्ट लेबल र MRP नभएका कुनै पनि मालसामानहरू खरिद-बिक्री नगर्न र नगराउन निर्देशन दिइएको छ। जिल्ला प्रशासन कार्यालयले अनुगमनका क्रममा यदि लेबल नभएको वा MRP भन्दा बढी मूल्य लिएको पाइएमा प्रचलित कानुन बमोजिम कडा कारबाही गरिने चेतावनी समेत दिएको छ। प्रशासकीय अधिकृत अन्तिम सिंजालीद्वारा हस्ताक्षरित यस सूचनाले उपभोक्तालाई ठगीबाट बचाउन र बजारलाई व्यवस्थित बनाउन सहयोग पुग्ने विश्वास गरिएको छ।
