चितवन : चितवनको भरतपुर महानगरपालिका–४ स्थित चौतारी पार्टी प्यालेसमा आयोजित विवाह भोज खाँदा ९३ जना बिरामी परेका छन् । वैशाख २३ गते आयोजित भोजपछि सहभागीहरूमा ‘फुड पोइजनिङ’ देखिएको हो ।
जिल्ला प्रहरी कार्यालय चितवनका प्रमुख एसपी गोविन्द पुरीका अनुसार बिरामीमध्ये ५० जनाको चितवन र काठमाडौंका विभिन्न अस्पतालमा उपचार भइरहेको छ । बिरामीहरूमा उच्च ज्वरो, पखाला तथा पेटसम्बन्धी समस्या देखिएको प्रहरीले जनाएको छ ।
सघन उपचार कक्ष (आईसीयू) मा रहेका दुई जनाको अवस्था सुधारोन्मुख भएपछि वार्डमा सारिएको प्रहरीले जानकारी दिएको छ । घटनापछि प्रहरीले अनुसन्धानका लागि पार्टी प्यालेससँग सम्बन्धित दुई जनालाई नियन्त्रणमा लिएको छ ।
उता खाद्य प्रविधि तथा गुण नियन्त्रण डिभिजन कार्यालयले भोजमा प्रयोग भएका खानाका नमुना परीक्षण गर्दै विषाक्तताको कारणबारे थप अनुसन्धान अघि बढाएको जनाएको छ ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
