बागलुङ : बागलुङ जिल्लाको ढोरपाटन नगरपालिकामा गोरु काटेको आरोपमा प्रहरीले १० जनालाई पक्राउ गरेको छ। ढोरपाटन नगरपालिका वडा नं. ३ घोसास्थित स्थानीयले मासु खाने प्रयोजनका लागि गोरु काटी भाग लगाउन लागेको भन्ने विशेष सूचनाका आधारमा प्रहरीले उनीहरुलाई नियन्त्रणमा लिएको हो।पक्राउ पर्नेहरुमा ४० वर्षीय लालबिर बि.क., २१ वर्षीय सरोज सुनार, ५५ वर्षीय यम बहादुर रोका, ५३ वर्षीय तिल प्रसाद सुनार र ६० वर्षीय थाम बहादुर सुनार रहेका छन्। त्यस्तै ४६ वर्षीय बिमल बि.क., २२ वर्षीय बिनोद सुनार, ३० वर्षीय जाल बहादुर कामी, ३७ वर्षीय भक्त बहादुर कामी र ४० वर्षीय रिम प्रसाद सुनारलाई पनि प्रहरीले घटनास्थलबाटै पक्राउ गरेको छ।
सोमबार बेलुका इलाका प्रहरी कार्यालय बुर्तिबाङबाट प्रहरी निरीक्षक तिलक मानन्धरको नेतृत्वमा खटिएको टोलीले उनीहरुलाई गोरु काटिरहेको अवस्थामा फेला पारेको सूचना अधिकारी एवं प्रहरी निरीक्षक कमल जंग थापाले बताए।प्रहरीले घटनास्थलबाट गोरु काट्न प्रयोग गरिएका हतियारहरु समेत बरामद गरेको छ। पक्राउ परेका १० जना विरुद्ध पशुपंक्षी सम्बन्धी कसूर अन्तर्गत गाई र गोरु मार्न वा काट्न नहुने मुद्दामा अनुसन्धान अगाडि बढाइएको थापाले जानकारी दिए। उनीहरुलाई बागलुङ जिल्ला अदालतमा उपस्थित गराएर पाँच दिनको म्याद थप गरी अनुसन्धान कार्य भइरहेको प्रहरीले जनाएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
