काठमाडौँ : सगरमाथा क्षेत्रमा सात दिनदेखि बेपत्ता रहेका दावा शेर्पा शुक्रबार बिहान जीवितै फेला परेका छन्। उनी खुम्बु आइसफल क्षेत्र नजिक अत्यन्त कमजोर अवस्थामा आधार शिविरतर्फ घस्रिँदै आइरहेको बेला उद्धार टोलीले भेटेको जनाएको छ।
खोजी अभियानका क्रममा फेला परेका शेर्पाको स्वास्थ्य अवस्था गम्भीर रहेको बताइएको छ। अत्यधिक चिसोका कारण उनका हातका औँलामा असर परेको प्रारम्भिक जानकारी प्राप्त भएको छ। उद्धारपछि उनलाई तत्काल उपचारका लागि सुरक्षित स्थानमा ल्याउने प्रक्रिया सुरु गरिएको छ।
उद्धारकर्मीका अनुसार माइनस तापक्रममा लगातार सात दिन बिताएर जीवित रहन सफल हुनु असाधारण घटना हो। यसअघि बिहीबार हेलिकप्टरमार्फत गरिएको खोजी अभियानमा समेत उनको अवस्था पत्ता लाग्न सकेको थिएन।
शेर्पा जीवितै फेला परेपछि स्थानीयवासी तथा उद्धारकर्मीहरूले यसलाई चमत्कारिक घटनाका रूपमा लिएका छन्। घटनापछि सगरमाथा क्षेत्रमा पर्वतारोही तथा सहयोगीहरूको सुरक्षा, निगरानी र उद्धार व्यवस्थाबारे पुनः बहस सुरु भएको छ। सम्बन्धित निकायले घटनाको विस्तृत विवरण संकलन गरिरहेको जनाएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
