काठमाडौं : भेनेजुएलामा गएको शक्तिशाली भूकम्पपछि मृत्यु हुनेको संख्या १ हजार ५ सय पुगेको छ। अन्तर्राष्ट्रिय सञ्चारमाध्यम रोयटर्सका अनुसार गत बुधबार ७.२ र ७.५ म्याग्निच्युडका दुई शक्तिशाली भूकम्पले ठूलो जनधनको क्षति पुर्‍याएको हो। भूकम्पका कारण अझै करिब ५० हजार मानिस सम्पर्कविहीन रहेको बताइएको छ। हालसम्म ३ हजार १५० जना घाइते भएका छन् भने १२ हजार ७२१ जना विस्थापित भएका छन्। साथै ७७४ वटा भवन पूर्ण रूपमा ध्वस्त भएका छन्।

सबैभन्दा बढी प्रभावित तटीय राज्य ला ग्वाइरामा स्वदेशी तथा विदेशी उद्धार टोलीहरू परिचालन गरिएका छन्। निरन्तरको उद्धार अभियानका क्रममा आइतबार पनि केही व्यक्तिलाई जीवितै भग्नावशेषबाट बाहिर निकालिएको अधिकारीहरूले जनाएका छन्। कार्यवाहक राष्ट्रपति डेल्सी रोड्रिगेजले उद्धार तथा पुनःस्थापना अभियान निरन्तर जारी रहेको बताउँदै अझै जीवित व्यक्तिहरू फेला पर्ने आशा कायम रहेको प्रतिक्रिया दिएकी छन्। उनले विद्यालयहरू थप एक साताका लागि बन्द रहने र प्रभावित क्षेत्रमा करिब ७५ प्रतिशत विद्युत् सेवा पुनः सञ्चालनमा आइसकेको जानकारी दिइन्।

प्रारम्भमा सरकारले राहत सामग्री पुर्‍याउने स्वयंसेवकहरूको प्रशंसा गरे पनि आपत्कालीन उद्धार कार्यलाई सहज बनाउन प्रभावित क्षेत्रमा सर्वसाधारणको आवतजावतमा केही प्रतिबन्ध लगाइएको छ। स्थानीय बासिन्दा, आफन्त तथा स्वयंसेवकहरूले विदेशी उद्धार टोली पुग्नुअघि नै भग्नावशेषमा फसेकाहरूको उद्धारमा सक्रिय भूमिका खेलेका थिए। उनीहरूले पर्याप्त भारी उपकरण र सरकारी स्रोतसाधनको अभाव रहेको गुनासो गरेका छन्। लगातार आइरहेका परकम्पका कारण उद्धार कार्य थप जोखिमपूर्ण बनेको छ।

सरकारका अनुसार शनिबारसम्म कम्तीमा ३३ जनालाई जीवितै उद्धार गरिएको थियो। आइतबार पनि एक पिता र उनका छोरालाई सकुशल उद्धार गरिएको जनाइएको छ। यसैबीच विपक्षी पक्षले सञ्चालन गरेको बेपत्ता व्यक्तिको अनलाइन सूचीमा अझै करिब ५० हजार मानिस सम्पर्कविहीन रहेको उल्लेख गरिएको छ। अमेरिकी भूगर्भ सर्वेक्षण (यूएसजीएस) ले यी शक्तिशाली भूकम्पका कारण अन्तिम मृत्यु संख्या १० हजारभन्दा बढी पुग्न सक्ने अनुमान गरेको छ। यस्तो भए यो पछिल्लो शताब्दीका ल्याटिन अमेरिकाका सबैभन्दा घातक भूकम्पमध्ये एक बन्न सक्ने विश्लेषण गरिएको छ।

उता मेक्सिकोको उद्धार टोलीले पनि काराबायेदास्थित एक भत्किएको भवनबाट ११ वर्षीय बालकलाई जीवितै उद्धार गरेको छ। पोप लियोले भूकम्पपीडितप्रति ऐक्यबद्धता जनाउँदै उद्धारकर्मीहरूको समर्पणको प्रशंसा गरेका छन्। यसैबीच अमेरिकी प्रशासनले यसअघि घोषणा गरिएको १५ करोड अमेरिकी डलरको राहत सहयोगबाहेक थप सयौं मिलियन डलर बराबरको सहायता प्याकेज सार्वजनिक गर्ने तयारी गरेको जनाएको छ। भूकम्पको प्रभावका कारण भेनेजुएलाको सबैभन्दा ठूलो अमुआय तेल प्रशोधन केन्द्र पनि ठूलो विद्युत् अवरोधपछि बन्द भएको बताइएको छ।