काठमाडौं : पछिल्लो केही दिनदेखि जारी वर्षाका कारण आएको बाढी र पहिरोले देशका विभिन्न भागमा मुख्य राजमार्गहरू अवरुद्ध भएका छन्। नेपाल प्रहरी र सडक विभागको पछिल्लाे तथ्याङ्क अनुसार, पाँचवटा प्रदेशका दर्जनौँ सडक खण्डहरूमा यातायात प्रभावित भएको छ।
कोशी प्रदेशमा भोजपुरस्थित मध्य पहाडी लोकमार्ग बाढीका कारण प्रभावित भएको छ, जहाँ हाल एकतर्फी मात्र यातायात सञ्चालनमा छ। यस्तै, इलामको मेची राजमार्ग र खोटाङको मध्य पहाडी लोकमार्ग (दिक्तेल रुपाकोट खण्ड) पहिरोका कारण पूर्ण रूपमा अवरुद्ध भएका छन्। इलाममा भने वैकल्पिक बाटोको व्यवस्था गरिएको छ।बागमती प्रदेशका मुख्य राजमार्गहरूमा बाढी र पहिरोको जोखिम बढेको छ। विपद व्यवस्थापनका लागि बिपी राजमार्ग (काभ्रे खण्ड) मा साँझ ६:०० बजेदेखि बिहान ४:०० बजेसम्म सवारी सञ्चालनमा रोक लगाइएको छ। त्यसैगरी, कान्ति लोकपथमा पनि बेलुका ५:०० देखि बिहान ५:०० बजेसम्म सवारी साधन चल्न निषेध गरिएको छ। सिन्धुपाल्चोकको अरनिको राजमार्गका दुई स्थान (जिरोकिलो र कोदारी) मा पहिरो खसेका कारण सडक पूर्ण रूपमा बन्द छ। दोलखाको लामासाँघु-रामेछाप राजमार्ग पनि बाढीका कारण ठप्प छ।
गण्डकी प्रदेशका पहाडी जिल्लाहरूमा पहिरोले ठूलो क्षति पुर्याएको छ। बागलुङको कालीगण्डकी करिडोर, लमजुङको बेंसीसहर-मनाङ सडक खण्ड र म्याग्दीको बेनी-जोमसोम सडक खण्ड पहिरोका कारण पूर्ण रूपमा अवरुद्ध भएका छन्। यी क्षेत्रमा यातायात पूर्ण रूपमा ठप्प हुँदा यात्रुहरू मर्कामा परेका छन्।
कर्णाली प्रदेशको रुकुम पश्चिममा भेरी करिडोर (जाजरकोट-डोल्पा खण्ड) बाढीका कारण पूर्ण रूपमा अवरुद्ध छ। उता सुदूरपश्चिम प्रदेशको डडेलधुरास्थित के.आई. सिंह राजमार्गमा पहिरो खसे पनि हाल एकतर्फी रूपमा यातायात सञ्चालन भइरहेको छ।
वर्षा जारी रहेकाले थप पहिरो जान सक्ने जोखिमलाई मध्यनजर गर्दै अत्यावश्यक काम बाहेक यात्रा नगर्न र यात्रा गर्नुअघि नजिकैको प्रहरी चौकी वा सडक विभागमा सम्पर्क गरी सडकको अवस्थाबारे जानकारी लिन अनुरोध गरिएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
