तेहरान : इरान सरकारले अमेरिका र इजरायलले गरेको पछिल्लो सैन्य आक्रमणमा परी आफ्ना ३,६०० भन्दा बढी नागरिक संरचनाहरू क्षतिग्रस्त भएको दाबी गरेको छ। इरानी रेड क्रिसेन्टले सार्वजनिक गरेको तथ्याङ्कलाई उद्धृत गर्दै इरान सरकारले सामाजिक सञ्जाल एक्समार्फत यस विनाशकारी हमलाको विवरण बाहिर ल्याएको हो।
इरानी रेड क्रिसेन्टका प्रमुखका अनुसार अहिलेसम्म कुल ३,६४३ वटा नागरिक स्थलहरूलाई निशाना बनाइएको छ, जसमा ३,०९० वटा निजी आवास र ५२८ वटा व्यापारिक केन्द्रहरू रहेका छन्।
आक्रमणको चपेटामा इरानका महत्त्वपूर्ण स्वास्थ्य सेवा केन्द्रहरू समेत परेका छन्। रेड क्रिसेन्टका ९ वटा केन्द्र र १३ वटा स्वास्थ्य संस्थाहरूमा गम्भीर क्षति पुगेको छ। विशेष गरी खातम अस्पताल, गान्धी अस्पताल र अन्य पुनस्र्थापना तथा कल्याणकारी केन्द्रहरू इजरायली र अमेरिकी आक्रमणको निशानामा परेका छन्।
आक्रमणका क्रममा अस्पतालका संरचनाहरू भत्किँदा त्यहाँ उपचाररत कतिपय बिरामीहरू घाइते भएको इरानी अधिकारीहरूले जनाएका छन्। यस्तै, भालियासर बर्न हस्पिटल जस्ता महत्वपूर्ण स्वास्थ्य सुविधाहरू पूर्ण रूपमा ठप्प भएका छन्।
इरानले यी आक्रमणहरूलाई मानवीय कानुनको उल्लङ्घन भन्दै अन्तर्राष्ट्रिय स्तरमा कानुनी लडाइँ लड्ने तयारी गरेको छ। इरानी रेड क्रिसेन्टले क्षतिसम्बन्धी विस्तृत प्रतिवेदन तयार पारी अन्तर्राष्ट्रिय रेडक्रस समिति (आईसीआरसी) र अन्य अन्तर्राष्ट्रिय निकायहरूमा बुझाइसकेको छ। नागरिक बस्ती र अस्पताल जस्ता संवेदनशील क्षेत्रमा भएको यो आक्रमणले मध्यपूर्वमा मानवीय सङ्कट झन् गहिरिने देखिएको छ। इरानले यस घटनालाई अन्तर्राष्ट्रिय मञ्चमा दृढताका साथ उठाउने र दोषीमाथि कानुनी कारबाहीको माग गर्ने स्पष्ट पारेको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
