काठमाडौं : आर्थिक अभावका कारण उपचारबाट वञ्चित हुनुपर्ने अवस्थाको अन्त्य गर्न काठमाडौं मेडिकल कलेज (केएमसी) ले विशेष सहुलियत कार्यक्रम ल्याएको छ। भक्तपुरको दुवाकोटस्थित केएमसीले देशका विभिन्न दुर्गम जिल्लाका अति विपन्न नागरिकलाई लक्षित गरी पूर्ण वा आंशिक छुटमा उपचार सेवा प्रदान गर्ने घोषणा गरेको हो।
पूर्व प्रतिनिधिसभा सदस्य समेत रहेका डा. सुनिल कुमार शर्माको विशेष पहलमा यो सेवा सुरु गरिएको हो। डा. शर्माका अनुसार मोरङ जिल्ला सहित देशका अति दुर्गम र आर्थिक रूपमा कमजोर क्षेत्रका बिरामीहरूलाई यो सेवामा प्राथमिकता दिइनेछ।
जसअनुसार कर्णाली र लुम्बिनी प्रदेशका हुम्ला, जुम्ला, डोल्पा, मुगु, कालीकोट, रोल्पा, रुकुम र सल्यानका विपन्न बिरामीले यो सुविधा पाउनेछन्। त्यसैगरी, कोशी प्रदेशका सोलुखुम्बु, ओखलढुंगा, खोटाङ, भोजपुर, धनकुटा, तेह्रथुम र ताप्लेजुङ तथा बागमती र गण्डकीका दोलखा, काभ्रे, सिन्धुपाल्चोक, नुवाकोट, धादिङ र गोरखा जिल्लाका बिरामीहरू पनि यसबाट लाभान्वित हुनेछन्।
यी जिल्लाका बिरामीहरूले केएमसीको सुपरस्पेसियालिटी अस्पताल, दुवाकोटमा आफ्नो आर्थिक अवस्था मूल्याङ्कनका आधारमा उपचारमा विशेष छुट वा पूर्ण निःशुल्क सेवा प्राप्त गर्नेछन्। यो सुविधा लिन इच्छुक विपन्न बिरामीहरूले आफ्नो सम्बन्धित पालिका वा वडा कार्यालयबाट 'अनुसूची–२' बमोजिमको सिफारिस फाराम र अन्य आवश्यक कागजातसहित अस्पतालमा सम्पर्क गर्नुपर्नेछ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
